Fréttir félagsliðar

Ýmislegt hefur verið gert á liðnu starfsári og skal þar fyrst nefna viðurkenningu á starfsheitinu okkar. Haldið var áfram að sækja um löggildingu eða sambærilega viðurkenningu á starfsheitinu félagsliði. Það gengur illa. Þrátt fyrir fundi og marg ítrekaðar fyrirspurnir, bæði til heilbrigðisráðuneytisins og félagsmálaráðuneytisins þá hefur ekkert gengið. Engin svör og hvorugt ráðuneytið hefur með afgerandi hætti ákveðið, hvort þeirra ætli að sjá um okkar mál. 
Ég hef það innan úr félagsmálaráðuneytinu að við vorum ekki með öllu gleymd, að Jóhanna Sigurðardóttir þáverandi félagsmálaráðherra hafi haft áhuga á okkar málum og viljað gera eitthvað fyrir okkur, en mörg meira áríðandi og stærri mál voru bara í forgangi.
Fjármálakreppan og bankahrunið í haust og stjórnarslitin í framhaldi af því, endurreisn fjármálakerfisins og fleirra, eins og þið þekkið, hefur tekið allan tíma ráðherra og stjórnvalda og því ekki nema bara von að þau gefi sér tíma að sinna okkar málum.
Í aðdraganda alþingiskosningana fór ég á kosningaskrifstofur stæðstu flokkana og spurði hvað þeir ætli að gera í okkar málum, bar upp á þá að ráðherrar þeirra hafi ekkert gert þrátt fyrir ítrekaðar umleitanir. Og að sjálfsögðu var öllu lofað, því allir eru vingjarnlegir við mann þ.e.a.s. væntanlegt atkvæði manns, svona rétt fyrir kosningar.  Því miður þá var of skammur tími fram að kosningum til að hægt hefði verið að reka mál okkar áfram. Ykkar ástkæri formaður gekk meira að segja svo langt, í þeirri von að geta eitthvað ýtt við málum okkar, að skrá sig í einn stjórnmálaflokkinn, flokk sem hann hefur aldrei og mun aldrei kjósa.

Eitt kom þó aftan að okkur. Okkur hafði verið sagt að það væri núverandi stefna stjórnvalda að löggilda ekki ný starfsheiti en annað hefur komið í ljós. Þann 30. mars síðast liðinn, fengu starfs- og námsráðgjafar löggildingu á sínu starfsheiti.  Hvort það hafi eitthvað með það að gera að námið þeirra er á háskólastigi veit ég ekki, þyki það þó líklegt, en mér finnst það hafa verið algjör óþarfi að segja okkur annað en það sem er.

Við höfum orðið vör við það að ýmsir aðilar virðast lítið sem ekkert þekkja til starfsheitisins félagsliði. Því var hannaður og prenntaður kynningarbæklingur um félagsliða og störf þeirra. Við sendum svo þennan upplýsingabækling á öll sveitarfélög landsins, sem eru 78 talsins. Einnig sendum við bæklingin á allar heilbrigðis- og öldrunarstofnanir, sjúkrahús og dvalarheimili. Það voru alls 166 aðilar.

Farið var í það að setja upp nýja heimasíðu fyrir félagið.  Sú gamla, sem er enn í notkun, er undir heimasíðu SFR, og hafa ýmsar almennar tilkynningar og fréttir sem betur ætti að heima einungis á þeirra síðu, ratað inn á okkar helming. Einnig hafa allar fyrirspurnir til félagsins, sem sendar eru í gegn um heimasíðuna okkar, þurft að áframsenda yfir á einkasíður stjórnarmanna svo hægt væri að svara, í stað þess að senda beint inn á eigin heimasíðu félagsins og svara öllu þaðan. Án þess að lasta SFR á nokkur hátt þá finnst okkur þetta henta okkur, sérstaklega þar sem Félag íslenskra félagsliða er fagfélag á lansdvísu og félagsmenn þess eru í mörgum stéttarfélögum. 
Við keyptum því lénið felagslidar.is og stóð til að við sæjum alfarið um hönnun og vinnslu síðunnar. Slíkt reyndist óráð og gafst ekki vel þar sem kunnáttan okkar var misléleg í þessum málum og þjónusta hýsingarfyrirtækisins fannst okkur vera slök. 
Einnig reynist það ekki vel til frambúðar að þurfa þjálfa alltaf upp nýja manneskju vegna mannabreytinga í stjórn.  Þess vegna var nýlega gengið til samninga við utanaðkomandi aðila til að hanna og hýsa fyrir okkur væntanlega nýja heimasíðu.  Sú vinnsla er núna í gangi og vonumst við til að sjá nýja heimasíðu von bráðar.

Við höfum verið í tengslum við símenntunarfyrirtæki, s.s. Framvegis og Starfsmennt vegna námskeiða fyrir félagsliða.  Hafa margir félagsmenn m.a. fengið póst til sín frá þessu aðilum. Við höfum einnig verið á fundum í Borgarholtsskóla vegna hugsanlegrar breytingar á námsskrá félagsliða.  Á síðasta ári voru gerðar breytingar á lögum um framhaldsskóla.  Nú eiga skólarnir að semja sína eigin námsskrá og senda ráðuneytinu til samþykktar.  Það er öruggt að allt félagsliðanámið verður tekið til endurskoðunar, enda ekki nema sjálfsagt því námið á þróast í takt við nýja þekkingu og breytingum á þjónustukröfum samfélagsins. Hugsanlega verða einhverjar námsgreinar samþættar öðrum, einingarfjöldi aukin eða minnkaður og námsgreinum bætt við eða feldar út. Þá verður haft samband við ýmis hagsmunasamtök þjónustuþega okkar, og stofnanir.  Kannað verður hvað þeim finnst mega betur fara í náminu okkar.
Við erum þegar byrjuð á þessari vinnu og var einn liður í henni að óska eftir skoðunum félagsmanna okkar um námsefni.  Félagsmönnum var nýlega sent bréf og óskað eftir hugmyndum um námsefni. 
Sorglega fáir hafa sinnt þessu kalli eða innan við 2% af félagafjölda okkar. Ég hvet því hér fundarmenn að taka þátt í þessu og senda okkur hugmyndir sínar og skoðanir á náminu, hversu lítílvægar þeim finnst þær vera.  Allt kemur að gagni.
Við höfum verið við útskriftir félagsliða frá Borgarholtsskóla og Mímir símenntun, en því miður ekki komist út á landi í sama tilgangi, þar sem rekist hafa saman útskriftardagar. Það er ánægjulegt að segja frá því að á síðastliðnu skólaári hafa yfir 100 félagsliðar útskrifast.

Við sendum s.l. sumar erindi til menntamálaráðuneytisins, erindi um smá lagfæringu á inntökuskilyrðum í brúarnám félagsliða. Við óskuðum eftir að menntamálaráðuneytið skilgreindi betur þetta skilyrði um 3ja ára starfsreynslu, að starfsreynslan væri einnig tilgreind í vinnustundum, þ.e.a.s. starfshlutfall. Við bentum á að t.d. 30% starfshlutfall í þrjú ár gæfi ekki sömu starfsreynslu og hærra starfshlutfall. Með fagmennsku félagsliðastarfsins í huga, þá væri rétt að þessu væri breytt. Svar menntamálaráðuneytisins var m.a. svo hljóðandi: “Að fengnu áliti starfgrein-aráðs heilbrigðis- og félagsgreina telur ráðuneytið ekki ástæðu til að breyta inntökuskil-yrðum í félagsliðanám samkvæmt brúarleið.  Hins vegar telur ráðuneytið  að við setningu aðalnámskrár framhaldsskóla fyrir félagsliðabraut, þar sem félagsliðabrúin er skilgreind, hafi það verið sameiginlegur skilningur allra þeirra er að málum komu að miðað væri við umönnunarstorf í a.m.k. þrjú ár í fullu starfi eða því sem næst. Ráðuneytið telur því eðlilegt að miða við það að starfshlutfall þess sem innritast á félagsliðabrú sé að öllu jöfnu ekki lægra en 80%.” Þetta eru samtals um 5000 vinnustundir á þremur árum.

Við vorum í vetur í sambandi við Hagstofu Íslands um upptöku á starfsheitinu félagsliði, inn í staðlaða starfsheitaskrá þeirra. Þetta kom til vegna þess, að þegar félagsliði skráði sig atvinnulausan hjá atvinnumiðluninni þá var/er óljóst í hvaða starfaflokk starfsheitið væri.  Vegna þessa höfðum við m.a. samband við félag heilbrigðisstarfsmanna á Englandi, sem svöruðu okkur vel.  Einnig sendum við fyrirspurn til alþjóðlegu vinnumálastofnunarinnar, vegna sama máls, en stofnunin hefur ekki enn svarað.
Fyrir liggur sú vinna hjá okkur, vegna beiðni Hagstofunnar, að skilgreina í stuttu máli mjög almenna lýsingu á starfi félagsliða.

Við sóttum um inngöngu í samtök heilbrigðisstétta en sú umsók féll sjálfkrafa niður þar sem samtökin voru lögð niður í byrjun ársins 2009. Skýringin sem ég fékk var m.a. sú að mikið af hagsmunagæslu samtakana hefur færst yfir til stéttarfélagana en einnig var lítill áhugi hjá aðildarfélögum að taka þátt í samtökunum.

Í byrjun starfsársins uppgötvaðist stór villa á félagaskránni okkar. Í stuttu máli, þá virtust vera til tvær skrár, sumir félagsmenn voru bara á annari skránni en ekki hinni og aðrir voru á báðum. Meðal annars var sá, er hér stendur, aðeins inni á annari skránni en ekki hinni sem var þó nýrri. Hvað olli þessu, er ekki vitað, þó grunar mig að visst ákvæði í félagslögunum okkar hafi einhverju um þetta ráðið. Síðar á þessum fundi verður lögð fram lagarbreytingartillaga sem ætti að stöðva slík mistök. Unnið var í því að laga þetta, þessar tvær skrár lesnar saman og bornar saman við þær aðildarumsóknir sem eru til.
Síðar kom í ljós, að bankinn sem þjónustar okkur, var með enn eina útgáfu af félagaskránni, sem var sambræðingur af áður nefndum skrám en þó með villum. Ákveðið var að gera ekkert í því fyrr en á nýju starfsári og verður það eitt fyrsta verk nýrrar stjórnar að láta bankann hafa nýja og uppfærða félagaskrá. 
Félagaskráinn okkar er því rétt í dag og eru félagar núna samtals 306.

Af gefnu tilefni þá er rétt að eftirfarandi komi fram. Það hefur aðeins borið á þeim misskilningi að fólk telji Félag íslenskra félagsliða vera stéttarfélag og því jafnvel sagt sig úr félaginu eða ekki gengið í það, þar sem það er að starfa undir kjarasamningi annars félags og greiði þangað sín félagsgjöld.
Þetta er misskilningur: Félag íslenskra félagsliða er ekki stéttarfélag, heldur er það fagfélag á landsvísu.  Allir félagsliðar geta gerst meðlimir í félaginu, óháð því í hvaða stéttarfélagi þeir tilheyra í dag.

Jóhannes A. Levy